قبل ما يفوت الميعاد
بقلم الكاتب وشاعر البسطاء سعيد سعيد امام
يا صاحبي فوق لنفسك قبل ما يفوت الميعاد
العمر مش ملك ايدك ولا الدنيا ليها ميعاد
كام واحد قال لسه بدري ولسه العمر قدام
وفجأة صحى من حلمه لقى نفسه على الميعاد
متقولش بكرة اتوب
بكرة دي كلمة غدارة
كام بكرة سرق من عمرنا
سنين من غير استشارة
واللي كان فاكرها فرصة
بقت في ايده خسارة
واللي اجل باب التوبة
صحى يطلبها في اخرة
يا نفس كفاية غفلة
كفاية جري ورا السراب
الدنيا بتضحك ساعة
وتسيب القلب وسط العذاب
تديك فيها الف حكاية
وتاخد منك اغلى شباب
ولما ينادي الرحيل
مفيش ساعتها غير الحساب
يا قلب بلاش تشيل حقد
ولا تسكن جواك خصام
سامح قبل ما تمشي
وسيّب للناس السلام
مافيش حد ضامن بكرة
ولا ضامن اخر الكلام
واللي ينام شايل كره
يمكن ميصحاش ينام
صون لسانك يا صاحبي
ده سهم لو طلع ما بيرجعش
كلمة ترفع انسان
وكلمة في قلبه ما بتترقعش
خلي كلامك طيب
والطيب عمره ما يضيعش
يمكن كلمة قلتها مرة
تكون سبب ان قلب ما يوجعش
ومتبصش لرزق غيرك
وتقول انا ليه اتحرمت
كل واحد له باب
وكل نفس ليها قسمت
ربك اعلم بالقلوب
وباللي خفي واتكتمت
يمكن اللي انت شايفه نعمة
صاحبه من جواه اتألمت
ولو رزقك يوم اتأخر
متقولش خلاص انتهيت
الرزق مش بس فلوس
ده ستر وانت ما حسيت
ده قلب لسه بيحبك
وده بيت ليه لسه جيت
وده باب ربنا فاتحه
وانت من الزحمة ما شفت
ولو حملك بقى تقيل
ومفيش في خطوتك حيل
ارمي حملك عند ربك
هو وحده نعم الوكيل
اللي يشوف دمعة عينك
قبل ما تنزل من غير دليل
واللي يعرف وجع قلبك
حتى لو مخبيه مستحيل
قوم اتوضى في هدوء
واقعد مع ربك شوية
احكيله كل اللي جواك
من غير كلمة ولا رواية
قول له يا رب انا تعبت
وانت ارحم بيا منايا
انا جاي لك من ضعفي
فاجعل توبتي بداية
متستحيش من ذنب فات
مدام قلبك تاب بصدق
ربنا اكرم من ذنوبك
ورحمته اوسع من الغرق
لو الدنيا قالت انتهيت
قول رحمة ربي ما بتغرق
باب الكريم لو فتحه
يحيي قلبا مات من القلق
وكم من عبد كان بعيد
ورجع بقلب منكسر
فلقى الرحمة حواليه
والحزن من روحه اندثر
مش شرط تمحي كل ماضيك
يكفي انك منه تعتبر
وتعيش باقي عمرك
وانت للخير تنتصر
اعمل في سرك معروف
محدش يعرفه غير ربك
يمكن عمل صغير خالص
يبقى يوم الحساب سببك
يمكن دمعة مسكين
تفتح لك باب قربك
ويمكن ستر انسان
يبقى ستر من عند ربك
ماتغترش بقوة جسمك
ولا بسنينك اللي فاتت
السنين اللي حسبتها ملكك
هي من عمرك اتاخدت
والدنيا مهما طولت
في يوم هتقول كفاية
وساعتها كل اللي هيفضل
دعوة حلوة وعمل وذكرى طيبة
يا صاحبي العمر امانة
وانت مش واخد منه ضمان
كل نفس بيتحسب
وكل خطوة ليها ميزان
فازرع في طريقك رحمة
ومتسيبش وراك احزان
يمكن تمشي من الدنيا
ويفضل عطرك في المكان
ولو ظلمت انسان سامحه
ولو ليك عنده حق سامح
مش معنى العفو ضعف
ده قلب عن الشر مسامح
واللي يقدر على الانتقام
ويختار العفو هو الرابح
لان ربك يحب قلب
على الخير دايما يصافح
خلي بيتك مليان ستر
وخلي حضنك للغريب امان
وخلي وشك لما تقابل
يفتح للناس مكان
يمكن واحد مكسور
يستقوى بكلمة حنان
وانت مش واخد بالك
كنت سبب في نجاة انسان
ويوم ما ييجي الرحيل
ماتقولش لسه بدري
ولا تقول يا رب ارجع
انا لسه ما عملتش خيري
الفرصة دلوقتي في ايدك
والطريق قدامك يجري
فخلي اخر زادك خير
قبل ما يخلص عمرك بدري
يا رب قبل اخر خطوة
وقبل ما نقابل المصير
نكون سيبنا في الدنيا
اثر طيب وسيرة خير
نكون ظلمناش قلوب
ولا كسرنا خاطر فقير
ونلقى بابك يوم نرجع
وانت علينا ارحم بصير
يا رب لو زادت ذنوبنا
انت اعلم بينا منا
ولو ضاقت بنا الدنيا
انت وحدك ملاذنا
اغسل قلوبنا من غفلتها
ونور دروبنا في خطانا
واكتب لنا حسن الختام
واجعل الجنة هي لقانا
خلينا نرجع لك بدري
قبل ما يرجع كل شيء
قبل ما ينشف في العين
دمعها ويخلص الرجاء
قبل ما نقف وحدنا
والعمل يبقى هو الشاهد
وقتها مش هينفع نندم
ولا هينفع نقول يا ليت
فيا اللي لسه في ايدك
نفس ولسه ليك مجال
ارجع لربك بقلب صادق
وسيّب عنك المحال
الدنيا مهما كبرت
آخرها حفنة تراب
واللي يفضل للعبد
رحمة ربنا وحسن الاعمال
والله يا صاحبي مفيش
اجمل من قلب تاب
ولا احن من رحمة ربك
لما تفتح لك الابواب
فمتستناش اخر لحظة
ولا تستنى وقت الغياب
ارجع وانت لسه قادر
قبل ما يقفل الكتاب
بقلم الكاتب وشاعر البسطاء
سعيد سعيد امام
0 تعليقات